I whānau mai tēnei kaupapa i waenganui i ngā piki me ngā heke o te noho whakamohoao mō te Taumata Tuawhā o te mate korona i Āperira 2020, nā te mea e kaha ake ana ngā mahi kaikiri ki a Ngāti Haina i runga ngā pae pāpāho pāpori, me ngā mahi kaikiri ki ērā o Ngāti Haina e noho ana i Aotearoa nei.

I tā mātou kōwhiri i te kaupapa mō ngā pānui whakaahua, ka whai whakaaro mātou ki ngā mahi kaikiri i konei, i Aotearoa, ā, he mea nui mō tēnei motu kia mōhiotia whānuitia he mea kino ēnei mahi kaikiri kei roto i ngā pūnaha katoa e tūkino ana i a Ngāi Māori, i ngā tangata whenua, mai i te taenga o te tāmitanga koroniara.

He kōrero hoki tā ngā hapori tauiwi kua tau mai nei ki Aotearoa e pā ana ki te kaikiri e kitea nei e rātou i ngā wā kua hipa, i tēnei wā tonu. Ko te hapori o Ngāti Haina tētahi.

He pōhiri tēnei kia hono mai ai koe ki te kaupapa!

• Tirohia te pae tukutuku nei – te kēmu patapatai, te rārangi wā me ngā kōrero mō ngā hapori Haina-Kiwi nei – ngā pānui whakaahua whakatairanga me ngā rauemi mō te patu kaikiri – me akiaki hoki koe i ō hoa kia haere mai, tirotiro haere ai

• Āwhinatia mātou kia kōwhiri i te toa mō te pōti o te marea – e tuwhera ana te wā pōti mai i te 8-22 o Oketopa kei tēnei pae tukutuku

• Mahia he mahi toi hei whakatairanga i te kaupapa nei, me uru hoki koe i te whakataetae!

Ko ngā pānui whakaahua me ngā rauemi kei runga i tēnei pae tukutuku he mea whakamana i ngā tāngata o Aotearoa kia ako i ngā rautaki pai mō te tū kaha, mō te whakautu tika, mō te whakapeka hoki i ngā mahi kaikiri a tētahi ki tētahi atu.

E whakahaeretia ana tēnei kaupapa e Bruce Mahalski (ringa toi), rāua ko Bev Hong (kairangahau).